Soosss's Journal, 25 Dec 20

لو كنت فاكر أنك ممكن توصل للنقطة الي تخليك تاكل الي انت عايزة ومتتخنش تبقي غلطان انا عن نفسي وقعت فترة مش قليلة بعد ٧ شهور متواصل أخدت فيهم يومين أو تلاتة فري والموضوع أبتدي لما حسيت أني نجحت وفعلا كنت فرحان بشكلي الجديد وتعليقات الناس وكدة فقررت فيوم اني هاكل حاجة كنت بحبها زمان فكلت والحقيقة أني علي عكس ما توقعت مكنتش مبسوط أوي بالعكس وحسيت علي طول ان بطني بتوجعني وقلت اي العبط دة أنا مش هعمل كدة تاني ولكن الي حصل أني قعدت حوالي شهرين ملغبط ومش بتحرك طبعا لأن الأكل الدسم بيطلب براحة فزيدت حوالي خمسة كيلو
الغريب أني طول الوقت كنت بقول أني أعرف أرجع فأي وقت وكنت بقول كل أنهاردة وبكرة نبقي نبتدي لكن مكنش بيحصل كل يوم كان بيبقي أسوء بس الحمد لله قدرت اكمل اول أسبوع علي خير ورجعت تاني نصيحتي لأي حد الأكل بيلعب فدماغة زيي متفكرش أبعد ماللحظة الي أنت فيها متفضلش تقول بكرة هعمل لو هتعمل حاجة اعملها دلوقتي وأوعي تفتكر أن حبك للأكل ممكن يختفي وتصحي الصبح تلاقي نفسك شخص تاني لأن دة مش هيحصل متحملش نفسك فوق طاقتها وتلوم نفسك علي فترة لغبطت فيها كلنا بنقع ونقوم عادي لكن لازم تفهم انك فحرب مع حاجة أنت بتحبها فالموضوع لازم ياخد شوية وقت .