Ayafeto's Journal, 23 Jun 22

على فكرة أنا كمان كدة باكل من اكل البيت بس بحسب السعرات وبحاول اقلل منها 500سعر وبشرب شاى اخضر وبصوم 16ساعة  

حاولي تخليهم يقللوا الزيت بس عادي ممكن تاخدي كمية صغيرة من اكلهم بس خليهم يقللوا الزيت  

ع فكرة أنا باكل من اكل البيت عادي وبقلل سعراتي بس مش باكل عيش ولاحاجة فيها دقيق أو سكر وبخس عادي بس كتري سلطة ومايه وكلي فاكهه 

انا كمان باكل من أكل البيت بس بوزن اكلي على اد سعراتي و بحط كل الاكل فطبق واحد و بعمل سلطه و باكل معاهم عادي  

انا مانع العيش خالص طول الاسبوع ماعدا اليوم الفري 

_ كل الخضار المطبوخ مفيش منه ضرر تقدري تاكلي منه الكمية اللي تشبعك سبانخ بقى ملوخية او كوسة ... الخ معادا النشويات المطبوخة (قلقاس و بطاطس) كلي منها بحذر و متدخليش معاها رز لانك كده دخلتي نوعين نشويات في يوم واحد يعني الانسولين طريق السلامة انت بقى يا فرج (يا نشويات مطبوخة يا اما رز و الاكل منهم بحذر) _ الدهون الطبيعية اللي في اللحوم و البيض و الفراخ و السمك مش مضرة اساسا و معرفش مين اللي اخترع هذه الفتوى العظيمة دي اللي مضر فعلا و سبب مشاكل في القلب و دهون الكلى و الامراض هي الزيوت المهدرجة او الزبدة النباتي و دي في ايدك تبدليها اقرألهم اضرارها و اقنعيهم ان صحتهم اهم و ملهاش علاقة باللي عامل دايت من اللي مش عامل دي صحتكم يا ناس ف مشكلتك كلها في تبديل الزيوت و الزبدة المهدرجة لسمن فلاحي او زبدة طبيعية لو عملتي كده تقدري تاكلي المسقعة عادي هي مش من المحرمات حرمتوها ليه؟ _ كلي عادي من اكلهم الدايت اسلوب حياة صحي مش مجرد نزول في الوزن و خلاص و لما نخس نرجع لعاداتنا اللي كانت السبب في المشكلة اصلا!! ايه هي العادات الغلط؟ انك تعملي حفلة انسولين ازاي تعملي حفلة انسولين؟ انك تاكلي دهون مع نشويات يعني تاكلي المسقعة باللحمة المفرومة و عليها سمن بلدي بالعيش او تعملي مكرونة بالبشامل ... الخ متخلطيش الدهون مع النشويات اوعي ها اوعي اختاري من على السفرة الاكل اللي ميعملش حفلة انسولين مع تنظيم اكلك في عدد ساعات معين اختاري اللي يناسب وقتك و صحتك و بس كده يا ست الكل مع طبعا البعد التام عن السكر الابيض و الدقيق الابيض عشان عمو الانسولين بيزعل زي ما قولنا و الفاكهة كليها طبيعية مش مجففة لان المجففة مليانة سكر و العصاير فيها سكر (و ربنا خلقلنا الفاكهة كده ليه نعصرها و نضيع فايدتها و نحولها لسكر حتى لو محطناش عليها سكر هتتحول لسكر برضو) و الفاكهة كارب كمان ف تتاكل بعناية يعني منخلصش كيلو تفاح عشان دايت معرفش مين سمح فيه بالتفاح فنقوم واكلينها كل يوم و بالكيلو و نقول مش بنخس ليه؟ كومنت طويل و ممل عارفة بس حبيت احطلك خبرتي فيه 😂❤️  

لا والله يا نهي إنتي فدتيني جداً بالكلام ده بس هي الفكره ف موضوع الزيوت عند اهلي انهم طول عمرهم كده غصب عنهم مش بمزاجهم احنا اسره كبيره شوية والظروف مش احسن حاجه والحاجه زي ماناس كتير اوي عارفه غاليه جداً وماما مش من حبها ف الزيوت يعني بالعكس هي لما بتعرف تجيب زبده طبيعي من وقت للتاني بتجيبها لان هي دايما كانت تقولي هو ده الصح وده ال اتربينا عليه فعشان كده مابقدرش اضغط عليها ف حاجه زي كده واتكلم فيها ... الحاجه التانيه بقي انتي قولتي ماينفعش ناكل مسقعه باللحمه المفرومه مع عيش مع سمن بلدي دلوقتي انا مش فاهمه الحته دي هي لو عملت مسقعه عادي بمكوناتها الطبيعيه بزيوت عاديه انا لو جيت اكل منها مااكلش عيش معاها واكلها لوحدها ولا اكل عادي ربع رغيف ولو اكلت منها اكل منها بكميه قد إيه مثلاً عشان اتجنب مخاطرها وايه ال ممكن اكله جنبها يديني المطلوب لجسمي ويديني احساس الشبع 

وانا برضو ياجماعه بوزن اكلي ع ميزان عادي مش ميزان سعرات وبحسب سعراتي ع اساس الكميه ع البرنامج هنا ومش باكل رز مع عيش ولا مع مكرونه بس هي المشكله ال بتقابلني بس ف البيت مع الحاجات ال فيها اختلاط زي المسقعه والمكرونه البشاميل الحاجات ال هي بتتحط ع بعضها كتير وكلها بتخن مش ببقي عارفه اتصرف فيها ازاي لكن اي حاجه تانيه بظبطها ودايما السلطه موجوده  

وكنت عاوزة اعرف بس لو انا مضطره اكل الاكل بزيت وسمن عادي هل ده يأثر عليا ف حاجه ويعمل حاجه ف صحتي عشان انا من الناس ال ممكن تدروخ شويه او تصدع وعندي انيميا من زمان فعاوزه افهم اكتر عن الحته دي  

السلام عليكم ورحمة الله وبركاته فيكي تاكلي من اكل البيت وعادي وطبيعي جدا انا كنت عاملة دايت قبل ما اتزوج وانزلت للوزن الي عايزاه وبقالي سنة ونص متزوجة ومازدتش الحمدلله مع العلم اني نزلت ٢٠ كيلو بس حافظي على شرب المية والرياضة ومش ضروري فالجيم فيكي تتمرني بالبيت عادي ولو ما لعبتيش رياضة حاولي تبقي خفيفة الحركة لو حد عايز مية مثلا قومي جيبهالو وكده واهم حاجة انو تكوني بتاكلي سلطات حافظي عليها كل يوم لو بتقدري واهم حاجة بعد ما تاكلي اي حاجة حاولي ما يأنبكش ضميرك كلي وانبسطي ولا تنسي دعاء الطعام (( الحمدلله الذي اطعمني هذا ورزقنيه من غير حول مني ولا قوة الحمدلله كثيرا طيبا مباركا فيه غير مكفي ولا مودع ولا مستغنى عنه ربنا )) واحمدي الله سبحانه وتعالى على النعم الي ادهالك ويارب توصلي للي عايزاه 

و الله كلامك يحترم و احترمتك اكتر بعده ❤️❤️ يسلم اللي رباكي ما شاء الله ❤️ _ المسقعة باللحم المفروم و الدهون كليها بالمعلقة اه طبعا مسموحة لو من غير بطاطس (بتنجان و دهون و لحم مفروم او من غيره حتى) مسموحة جدا لكن مش بالعيش لان اللحم المفروم داخل فيه دهون صحية غير الدهون اللي هتحطيها و البطاطس طبعا نشويات و الدهون مع النشويات صعب تخسي عليهم الانسولين طول ما هو عالي في الدم الجسم مش بيتحكم في الحرق في الوقت ده اللي بيتحكم فيه الانسولين و الانسولين بيفتح الخلايا الدهنية يخزن دهون عمر ما الانسولين بيحرق ابدا غير لما يوطى و بيوطى في حالة واحدة و هي الصيام (اعملي صيام متقطع ممتاز و هيساعدك) فحاولي تتجنبي النقطة دي و هي خلط الدهون بالنشويات على قد ما تقدري _ الدهون هي المسئولة عن الشبع اساسا طول ما في دهون في اكلك هتشبعي بسرعة النشويات بتجوع بعد الهضم بساعتين اللي بيقول العيش و الرز هو اللي بيشبع غلطان بعد ما النشويات تتهضم هتجوعي بعد ساعتين عايزة اثبات؟ فيه ناس ممكن تخلص رغيفين عيش في طبق ملوخية اساسا يبقى بنشبع ازاي؟ جربي تاكلي نفس طبق الملوخية بالمعلقة او طبق سبانخ او بامية او كوسة او اي خضار مطبوخ و شوفي نفسك هتشبعي و الطبق لسه مليان و لا لاء _ مفيش كمية محددة متقوميش من على السفرة غير و انتي شبعانة لو مش متأكدة انك شبعانة سيبي الاكل 10 دقايق و شوفي حاسة بجوع و لا خلاص بطنك اتملت _ طول ما انتي بتاكلي عينات مش هتخسي صعب تقليل الاكل زيادة عن اللزوم بيدخل الجسم في حالة مجاعة و بيتمسك بالدهون اللي هو اصلا مخزنها عشان الوقت ده و بيبدأ يحرق العضالات لانه بالنسبة له ملهاش لازمة فكلي لحد ما تشبعي من الخضار المطبوخ و البروتين و ابعدي عن الدقيق الابيض و النشويات كلي النشويات النضيفة بس اللي ربنا خلقها اللي هي رز بكل انواعه و البطاطس و القلقاس و البطاطا انما العيش و المكرونة بلاش منهم اليوم اللي فيه خضار مطبوخ كلي بالمعلقة الكمية اللي تشبعك اليوم اللي فيه نشويات زي الرز او بطاطس.. الخ خدي نوع واحد منها و كليه بحذر ده اللي لازم يتحدد الكمية بتاعته للاسف يكفي مغرفة كبيرة او معلقة واحدة بتاعت الغرف دي تعايشي بقى على هذا الاساس و لو فيه بروتين جنبهم طبعا مسموح اي كان نوع البروتين بس حاولي ميكونش محمر في زيت بقى كفاية الاكل التاني و لو فيه سلطة ضيفي برضو في الوجبة طبقى سلطة و برضو السلطة بتتعامل معاملة الخضار كمية تشبعك  

بطول عليكي عارفة بس بحب اشرح مين بيعمل ايه و ازاي و ليه عشان تعرفي تكيفي اكلك على اساسه و تتعايشي مع اي نوع اكل  

ممكن عادي تاكلي مسقعة كدا بالشوكة وجنبها طبق سلطة محترم واشربي قبلها كوبيتين مايه 

لا عادي الزيوت ملهاش علاقة بالانيميا هي بس سبب الكروسترول في الدم حاولي تقللي منها على قد ما تقدري يعني متغطيش الاكل كله بالزيت يكفي معلقة صغيرة سواء سمن او زيت مهدرج لو وقتك مساعدك تخشي المطبخ تراقبي الكمية اللي بتتحط يبقى عظمة .. كنت بدخل اراقب الاكل كده ساعات لحد ما امي بقت تقولي بطلت احط زيت بسببك كرهتيني فيه 😂 ساعات اقولها بصي انا هاخد شوية بانية او لحم مفروم قبل ما تتحط على المكرونة البشامل و اكلهم مع سلطة و خلاص عملت وجبتي الاولى و هكذا حاولي تتكيفي مع الاكل لسه عاملة مسقعة من كام يوم اخدت طبق محترم قبل ما امي تحط بطاطس عليها و كلتهم بالمعلقة حاولي تكيفي نفسك على قد ما تقدري لو زنقت اوي اوي و خلاص هيعملوا اكل يغضب علينا الانسولين كنت بيسلق بيض و اكلهم بالمعلقة مع جبنة او من غيرها اتصرفلي في اي علبة تونة و اصفيها و اكلها بالخس او جرجير الفكرة كلها حاولي تتكيفي مع المتاح بقدر الامكان بدون الخلط اللي قولتلك عليه مع صيام متقطع 16 ساعة و امنعي السكر هتمشي الدنيا  

و لازم تعالجي الانيميا صح لان مستحيل جسمك يحرق و فيه معادن و فيتامينات ناقصة ده بيعطل الحرق حتى لو خسيتي في الاول هتيجي في النص و الحرق يعطل و يحصل ثبات لازم تاخدي الادوية المناسبة اللي يحددهالك الدكتور  

انا باكل من اكل البيت مهما كان اية و خاسس ١٣ كيلو و اخويا خاسس فوق ال٣٠ كيلو اهم حاجة بنسبالي اني ماكلش كارب كتير و الطبيخ قولي للجماعة يستخدموا دهون قليلة و اكيد مش كل يوم اكل معمول بدهون كتير يعني  

اهم شيئ تمنعي الخبز بانواعه الدقيق والسكريات وهتخسي اكيد كلي زي ما تحبي خضار وما تقلقيش  

ربنا يخليكي يا نهي ❤️ وبجد والله انتي فدتيني جداً وكفاية انك بتكتبي كل ده عشان تفهميني صح تعبتك معايا معلش ... بس اخر حاجه عاوزة افهمها عشان ارتبها ف مخي بس دلوقتي ال اعرفه ان المفروض نسبة الكارب ماتكون عاليه ولكن دايما بلاقيها اعلي من نسبة البروتين عندي وانا عارفه ان فيه كارب عادي وكارب معقد اعمل إيه عشان نسبة البروتين تبقي اعلي ونسبة الكارب تبقي اقل وإيه امثلة للكارب ابعد عنها او اقلل منها .. وانا بالفعل ماشيه ع نظام الصيام المتقطع .. وليه البرنامج هنا مش بيجيب اشعار ان حد علقلي حاجه ع البوست انا لسه شايفه الكلام بالصدفه وماعنديش ولا اشعار خالص ع البرنامج  

وشكراً بجد لكل ال كتبلي حاجه انتوا بتفيدوني جدا وبعرف فعلاً منكوا حاجات كنت مااعرفهاش خالص ❤️ 

Kordy كنت بتقول مش باكل كارب كتير ممكن تفهمني الحته دي او تقولي مثلاً امثله عن اكلك بتاكل ايه وبتقلل كارب ازاي وايه اصلا نسبة الكارب ال محتاجه الجسم